| DURANTE A FESTA DA FABA
O Centro de Interpretación da Faba abre as súas portas
O pasado sábado 2 de outubro quedou oficialmente inaugurado o Centro de Interpretación da Faba de Lourenzá. Centos de persoas visitaron ao longo da fin de semana este museo pioneiro no que é posible coñecer a historia e características da faba dende diversas perspectivas.
[05/10/2004] O Centro de Interpretación da Faba de Lourenzá rexistrou unha gran afluencia de público durante as súas primeiras xornadas de apertura. O Director Xeral de Planificación e desenvolvemento Comarcal, Jesús Cudeiro Mazaira, foi o encargado de inaugurar oficialmente as instalacións. Interviñeron ademais no acto o alcalde de Lourenzá, Vidal Martínez-Sierra e representantes da empresa Vieiros S.L., responsable da posta en marcha do recinto.
Este novo museo constitúe unha clara aposta de futuro orientada ao coñecemento, promoció e divulgación da Faba de Lourenzá. As súas instalacións divídense en diferentes bloques temáticos que analizan aspectos como a historia da leguminosa, as cifras de produción mundial ou a importancia dos cultivos na Mariña lucense.
Ademais de contar con paneis divulgativos, o Centro de Interpretación da Faba inclúe unha sala de proxeccións e unha zona cíber dotada de varios equipos informáticos. Por último, destaca especialmente a sala túnel, onde poden contemplarse diversos apeiros, cedidos polos agricultores da zona, empregados no cultivo e recolección da faba.
A posta en marcha do Centro de Interpretación da Faba de Lourenzá foi posible grazas a un proxecto Leader Plus no que se integran a Xunta de Galicia, o Ministerio de Agricultura, AGADER, a Comisión Europea D.G. Agricultura, INLUDES, a Deputación de Lugo e o Concello de Lourenzá.
- Xunta de Galicia
- Axencia Galega de Desenvolvemento Rural -AGADER-
- Deputación de Lugo
- INLUDES
- Ministerio de Agricultura
« Noticias
|
